Hona hemen zortzi txio laburrok:
1) Arrazoi du Gabi Oyharzabalek dioenean hemen, Hego Euskal Herrian, eta bereziki EAEn, beti aitzakiak ditugula besteri egozteko euskara gibelatzearen erantzukizuna.
2) Eragozpenak eragozpen, euskara legezkoa da hemen, lanpostu publikoetan lan egiteko eskakizunetako bat, eta, Euskararen Legearen (koofizialtasunaren) 40 bat urteren bueltan, asko eta asko gara euskara(z) ikasi eta bizitzeko (benetako) gaitasuna dugunok.
3) Hala ere, edozein aitzakia erabiltzen dugu, egunero, uneoro, gaztelaniaren mundu erakargarri eta txundigarrian murgiltzeko. Eta GU maiestatikoa darabildanean, ez dut esan nahi denok berdin jokatzen dugunik, denok euskarari eta, hortaz, Euskal Herriari traizio egiten diogunik.
4) Badakit, bai, euskaradun huts nahiz euskaldun zintzo askotxo dagoela, zaudetela edo gaudela, baina nabarmenegiak begitantzen zaizkit bestelakoak, erdarara jauzi egiteko ia aitzakiarik ere behar ez dutenak.
5) Izan ere, nik egunero-egunero entzuten ditut euskaldunak euren artean gaztelaniaz berbetan; maiz, niri inoizkotan eta bakarka euskaraz egiten didaten euska(ra)(l)dunak (?).
6) Batzuetan, eta ez gutxitan, pentsatu izan dut hobe litekeela, lehengo garaietan bezala, euskarak (benetako) jazarpena eta debekua jasan beharko balu, horrela behintzat, euskal kontzientzia, akaso, berriro piztuko bailitzateke eta horrek, nonbait, koherentziaz jokatzera animatuko gintuzke.
7) Tira, barkaidazue, euskaldun txiolari zintzook, baina arrats txarra pairatzen ari naiz zentzu horretan, enegarrenez, semeen entrenamendu orduan nahiz osteko ohiko garagardo dastaketan: zenbat eta zenbat 'euskaldun' erdaraz egiten!
8) Eta ni, zer ondo txokotxo honetan, bazter, bakarrik. Umeak hartu eta etxera noa, zazpiak jotzeko dira eta.
Dena egina dago zure burmuina erdaraz pentsatzeko, euskararen eskakizuna? Meritua askotan, arras ezberdina. Egunero saiatzen naiz euskaraz bizitzen, euskara dakien erdaldunzaleak, ez dit inoiz euskaraz egitea galarazi. Ez dakienak, ikasi nahi ez duenak, beti. Zure burua euskaraz funtzionatzeko gauz asko behar dira, garrantzitsuenetakoa, denek euskara ikastea da, derrigorra izatea. Administrazioak erdaraz funtzionatzen du, Osakidetza, epaitegiak, edozein administrazio, euskara planak ez dira betetzen.. Euskaraz egitea liskartsua da, horrek ez erabiltzea dakar, zure burmuinak erdara hobeto menderatzen du... Ta salbuespenak salbuespen,erdaraz egingo dute, zure burmuinak naturalago ateratzen zaiona aukeratuko du beti. Beraz beste gauz askoren artean, euskara derrigorra izan behar da, ez da inor aitzakiatu behar ikasi ez dezan. Euskaldunari biak jakiteaz aparte, betiko estresan bizitzea eskatzen ari diogulako, ta horrela, euskarak beti galduko du. Ta EAEn euskara jasarria dago, egunero pairatzen dut.
ErantzunEzabatu